Kuwa 24 Mata 2026,  ku cyicaro cy’Urwego rw’Igihugu rushinzwe Uburezi bw’Ibanze (REB), habereye inama yaguye yahuje abayobozi n’abakozi bose b’uru rwego, iyobowe n’Umuyobozi Mukuru wa REB, Dr. MBARUSHIMANA Nelson. Iyi nama yari igamije gusuzuma aho ibikorwa bya REB bigeze, by’umwihariko ishyirwa mu bikorwa ry’igenamigambi ry’igihembwe cya gatatu, no kurebera hamwe ingamba zo kurushaho guteza imbere ireme ry’uburezi mu mashuri. 

Muri iyi nama, abayobozi n’abakozi ba REB barebeye hamwe aho bageze mu rugendo rwo kugera ku ireme ry’uburezi ryifuzwa. Hibanzwe cyane ku gusuzuma ishyirwa mu bikorwa ry’igenamigambi ry’ibikorwa bya REB mu gihembwe cya gatatu, hagamijwe kureba ibyakozwe neza, imbogamizi zagaragaye, ndetse no gufata ingamba zo kurushaho kunoza imikorere mu bihe biri imbere. Ibiganiro byagaragaje ko hari intambwe ikomeye igaragara imaze guterwa mu kuzamura ireme ry’uburezi, nubwo hakiri imbaraga zisabwa mu gukomeza guteza imbere imyigire n’imyigishirize, gukoresha ikoranabuhanga mu burezi, no kongera ubushobozi bw’abarimu.

Ikindi cyaranze iyi nama ni igikorwa cyo gusezera ku bakozi babiri bakoreye uru rwego bagiye mu kiruhuko cy’izabukuru, ari bo Madamu MUKAYIREGE Julienne na Bwana NTAGANDA Innocent. 

Madamu Mukayirege yakoze umurimo wo kurerera Igihugu (Umurezi) kuva mu 1979 kugera mu 1994. Julienne yahawe inshingano nshya zo gukorera Urwego rw’ Igihugu Rushinzwe Uburezi bw’ Ibanze (REB); aho kuva mu 1995 kugera mu 2025 yakoze imirimo itandukanye. Yabaye Umukozi ushinzwe uburinganire, Ushinzwe integanyanyigisho y’ Igifaransa, Ushinzwe integanyayigisho y’ubumenyi mbonezamubano n’ iyobokamana. Mbere yo kujya mu kiruhuko cy’ izabukuru yari Umuyobozi w’ agateganyo w’ agashami gashinzwe uburezi budaheza n’ ubwihariye. Bwana Ntaganda yakoreye REB nk’ umukozi wari ushinzwe integanyanyigisho y’ ubutabire (Chemistry Curricula Officer); yatangiye imirimo ye mu Rwego rw’Igihugu rushinzwe uburezi bw’Ibanza guhera  2006 kugeza mu 2025.

Aba bakozi bashimiwe byimazeyo uruhare rwabo rukomeye mu guteza imbere uburezi bw’ibanze, by’umwihariko umurava, ubwitange n’ubunyangamugayo byabaranze mu gihe cyose bakoraga inshingano zabo. Ashimira aba bagiye mu kiruhuko cy’ iza bukuru, Umuyobozi Mukuru wa REB yavuze ko urugero basubitse ruzakomeza kubera abandi bakozi isomo ryiza ryo gukorana ubwitange no guharanira iterambere ry’Igihugu.

Iyi nama kandi yabaye umwanya mwiza wo kongera kwibutsa abakozi bose ba REB inshingano bafite mu gushyira mu bikorwa gahunda za Leta zigamije guteza imbere uburezi bufite ireme, bafasha kandi umunyeshuri kubona ubumenyi n’ubushobozi bujyanye n’ibikenewe ku isoko ry’umurimo.

U Rwanda rukomeje kwiyemeza kuba igihugu gifite ubukungu bushingiye ku bumenyi, nk’uko bigaragara muri gahunda zitandukanye zirimo Vision 2050 na NST1 mu cyerekezo cy’ Igihugu. Kugera kuri ibi bisaba ko uburezi bw’ibanze bukomeza gushyirwamo imbaraga, kuko ari bwo shingiro ry’ubumenyi bwose. REB ifite uruhare rukomeye mu gutuma iri cyerekezo rigerwaho, binyuze mu guteza imbere integanyanyigisho zijyanye n’igihe, kongera ireme ry’imyigishirize, kwimikaza ikoranabuhanga mu burezi, gutegura ndetse no guhugura abarimu bashoboye kandi bashobotse, kwimakaza uburezi budaheza n’ubw’abakuze. Ibi byose bigira umusaruro mwiza ku bumenyi abanyeshuri bavana mu mashuri. 

Muri rusange, inama yaguye ya REB yongeye kugaragaza ko ubufatanye bw’abayobozi n’abakozi, isuzuma rihoraho ry’ibikorwa, n’ubwitange mu kazi ari inkingi zikomeye zo kugera ku ntego yo guteza imbere uburezi bufite ireme, bufasha u Rwanda kugera ku iterambere rirambye.