Mu gitondo cyo kuwa 17 Gicurasi 2026, mu mahumbezi meza yo ku misozi ya Save, mu karere ka Gisagara ku ishuri rya TTC Save; mu gitondo cya kare kare; kuva saa kumi n’ebyiri za mu gitondo, abanyeshuri, abarimu ndetse n’abayobozi b’ibigo by’amashuri bari bamaze kugera ku kibuga, biteguye kwifatanya mu gikorwa cya siporo rusange cyari kiyobowe n’Umuyobozi Mukuru w’ Urwego rw’ Igihugu Rushinzwe Uburezi bw’ Ibanze (REB), Dr. MBARUSHIMANA Nelson, hamwe n’abayobozi b’ibigo by’amashuri.

Urubyiruko nk’ imbaraga z’Igihugu, rwahanitse amajwi meza yuje akanyamuneza n’imbaraga bitanga icyizere cy’ejo hazaza. Abanyeshuri bo muri TTC Save na TSS Save Saint Kizito barenga 1200, bifatanyije mu gukora imyitozo ngororamubiri izwi nka “Aerobic exercises” yamaze amasaha abiri yose, kuva saa kumi n’ebyiri kugeza saa mbiri za mu gitondo. Byari ibikorwa byuzuyemo imbaraga, ubusabane n’ishyaka biganisha ku kubaka ubuzima bwiza binyuze mu gukora Siporo.

Mu butumwa bwe, Umuyobozi Mukuru wa REB; yashimangiye ko siporo atari imyidagaduro gusa, ahubwo ari imwe mu nkingi zikomeye zifasha urubyiruko kugira ubuzima bwiza no gutsinda neza amasomo. 

Umuyobozi Mukuru wa REB yagize ati: “Turifuza ko abanyeshuri bose bazajya bakora siporo nibura umunsi umwe muri weekend kandi bikaba umuco. Ibi bizafasha kwimakaza Indangagaciro z’ Umuco nyarwanda,  kurwanya indwara ziterwa no kudakora siporo, kongera amahirwe yo kugira ubuzima bwiza, gushimangira umuco wo gukorera hamwe no gufashanya ndetse no kuzamura imitsindire mu mashuri.”

Yavuze ko siporo yubaka byinshi birenze kubaka imbaraga z’umubiri gusa, kuko ifasha urubyiruko kugira indangagaciro zikomeye zirimo gukorera hamwe, ubutwari, gukunda igihugu, ubupfura, guhatana no gushaka ibisubizo ku bibazo abantu bahura na byo mu buzima bwa buri munsi.

Dr. MBARUSHIMANA Nelson yibukije ko iyo urubyiruko rukuriye ahari muco mwiza wa siporo, haba hubatswe ejo hazaza heza h’umuryango n’Igihugu muri rusange. Yagize ati: “Iyo ukoze siporo ukabigira umuco kuva ukiri muto, uba ubiba imbuto nziza zizasoromwa n’abazagukomokaho.”

Yakomeje asobanura ko siporo ifasha abanyeshuri n’abarezi; aho ibitekerezo bijya ku murongo, ikabafasha kongera imbaraga no kugira ubushake bwo gukora neza ibikorwa byo kwiga no kwigisha. Kuri we, ishuri rifite abanyeshuri n’abarimu bakora siporo, ni igisobanuro cyuzuye aho uba wizeye ko abari muri iryo shuri  bafite imbaraga zikwiye n’ubuzima bwiza aribyo bigira ingaruka nziza ku mitsindire muri rusange. 

Mu rwego rwo gushyigikira iterambere rya siporo mu mashuri, Umuyobozi Mukuru wa REB yashyikirije TTC Save na TSS Save Saint Kizito ibikoresho bya siporo birimo imipira ya Football, Basketball, Volleyball na Handball. Ibi bikoresho bikaba bizafasha abanyeshuri gukomeza kwimakaza siporo mu mashuri.

Nyuma y’ibikorwa bya siporo, hakurikiyeho gahunda ya “FresheriKuIshuri”, aho abanyeshuri n’abayobozi bifatanyije mu gukora isuku ahantu hatandukanye harimo aho bigira, aho barara ndetse n’aho bafatira amafunguro. Iki ni ikimenyetso cy’ uko ubuzima bwiza butangirira ku isuku no kubungabunga ibidukikije byose bikajyana n’ imyitozo ngororamubiri.

Umunsi wasojwe no gusangira ifunguro rya mu gitondo hagati y’abayobozi, abarimu n’abanyeshuri, mu rwego rwo gukomeza kwimakaza ubusabane n’ubumwe.

Umuyobozi Mukuru wa REB yashishikarije abayobozi b’ibigo by’amashuri n’abanyeshuri gukomeza kuba umusemburo w’iyi gahunda ya siporo; ikazajya iba umunsi umwe buri weekend, agaragaza ko siporo ari isoko y’ubuzima buzira umuze, ubufatanye n’iterambere ry’uburezi bufite ireme.