Tariki ya 18 Nzeri 2022, mu gihugu hose, Abayobozi b’ibigo by’amashuri y’inshuke, abanza, ayisumbuye n’ay’imyuga n’ubumenyingiro ya Leta, n’ay’Abafatanya na Leta ku bw’amasezerano bateraniye mu mahugurwa y’uyu munsi umwe ajyanye no gukarishya ubumenyi mu miyoborere.

Mu ntara y’Amajyepfo hateraniye abayobozi b'ibigo by'amashuri bagera 1046, abayobozi b’ishami ry’uburezi mu ntara y’amajyepfo, abayobozi b’uturere bungirije bashinzwe imibereho myiza, abayobozi b’ubuturere (Mayor), Guverineri w’ intara y’amajyepfo, Madam Kayitesi Alice, Umuyobozi Mukuru w’Urwego rw’Igihugu rushinzwe uburezi bw’Ibanze (REB) , ndetse n’Umushyitsi Mukuru muri uwo muhango Nyakubahwa Minisitiri muri Minisiteri y’Ubumwe n’Uburere Mboneragihugu (MINUBUMWE), Dr. Jean Damascene Bizimana.

Intego rusange y’ibiganiro yari ukangurirana no kwibutsa abayobozi b’ibigo by’amashuri inshingano n’umusanzu wabo mu miyoborere iboneye y’ibigo by’amashuri. Insanganyamatsiko y’amahugurwa agenewe Abayobozi b’ibigo by’amashuri ni ‘Imiyoborere iboneye y’ibigo by’amashuri n’uruhare rw’umuyobozi w’ikigo mugukemura ibibazo bibangamiye umuryango nyarwanda.’

Abayobozi b'ibigo by'amashuri bakurikiranye ikiganiro cyatanzwe Nyakubahwa Minisitiri wa ‘MINUBUMWE’, iki ikiganiro cyari gifite umutwe ugira uti: ‘Intekerezo shingiro n’imiyoborere y’u Rwanda kuva 1994.’

Nyakubahwa Minisitiri, Dr. Jean Damascene Bizimana yabwiye bayobozi b'ibigo by'amashuri ko mu byo bakora byose bajye bazirikana ko ari abigisha ndetse bakaba n'ababyeyi, Ibyo kandi bibaha inshingano zo gushaka ibisubizo by'ibibazo u Rwanda rwatewe n'amateka.

Guverineri w’Intara y’amajyepfo, Kayitesi Alice yatanze ikiganiro kigaragaza Imikorere y’ibigo by’amashuri yo mur’iyo ntara. Guverineri w'Intara yagaragaje ingufu n'amahirwe bihari muri iyo  Ntara byafasha mu guteza imbere ireme ry'uburezi ndetse yasabye abayobozi b'ibigo by'amashuri gukoresha neza amahirwe ahari arimo na politiki nziza y'uburezi.

Umuyobozi Mukuru wa REB, Dr. Nelson Mbarushimana yatanze ikiganiro gifite umutwe ugira uti: "Imiyoborere iboneye y’ibigo by’amashuri n’uruhare rw’umuyobozi mugukemura ibibazo bibangamiye umuryango nyarwanda."

Umuyobozi Mukuru wa REB yagaragaje imyitwarire n'imigirire igomba kuranga Umuyobozi w'Ishuri uhamye, ndetse yibukije abayobozi b'ishuri ko aribo musingi w'uburezi bwifuzwa kuko ikigo kiyobowe neza kigira n'abanyeshuri batsinda neza.

Philomène Nyirahuku,Umuyobozi w'Ishuri rya Ecole Notre Dame de la Providence -Karubanda yashimye Leta y'u Rwanda mu mbaraga ikoresha mu guteza imbere uburezi ndetse anashimira Leta kuba yaratekereje ku mibereho myiza y'abarezi yongera umushahara wa Mwarimu.

Nsanzimana Thacien, Umuyobozi w'ishuri ryo mu Karere ka Nyamagabe  yavuze ko ashimira Leta y'u Rwanda ko yashyizeho politiki y'uburezi budaheza ndetse anashima ko Leta yongereye imishahara y'abarezi bose.

Nyuma y’amahugurwa, hafashwe imyanzuro ikurikira:

Abitabiriye amahugurwa biyemeje kugeza ibiganiro bivuga ku mateka yaranze u Rwanda mbere mu gihe na nyuma y’ubukoroni ku barezi n’abanyeshuri bagahera ku ngero zifatika zagiye zisenya uburezi bw’u Rwanda n’igihugu muri rusange hubakwa uburezi bufite ireme kandi butavangura.

Hamaze gusuzumwa ibimaze kugerwaho mu burezi bijyanye no kubaka ibyumba by’amashuri bihagije, kongera umushahara wa mwarimu, gutanga ibitabo mu mashuri, mudasobwa, internet n’ibindi, abayobozi b’ibigo by’amashuri biyemeje kunoza imyigire n’imyigishirize, ibibazo by’abana barangiza batazi gusoma, ndetse n’abarangiza badafite ubumenyi buhagije bikaranduka burundu mu ntara y’Amajyepfo.

Abayobozi b’ibigo by’amashuri biyemeje gushyira imbaraga mu cyiciro cya mbere cy’amashuri abanza, bashyira abarimu bashoboye muri icyo cyiciro, bashyira abanyeshuri biga muri icyo cyiciro mu mashuri meza, bagahindura imyumvire bari bafite ko mu cyiciro cya mbere cy’amashuri abanza ariho hashyirwa abarimu badashoboye, abanyeshuri baho ari bo bakwiye  kwigira mu mashuri mabi, ashaje, adafite urumuri,.. kandi iki cyiciro ari cyo musingi w’ubundi bumenyi.

Abitabiriye amahugurwa biyemeje gukurikirana imyigire n’imyigishirize,bareba ko ibigomba kwigishwa byose byigishijwe kandi neza, umuco mubi wo kutarangiza ibikubiye mu nteganyanyigisho (program) ukunze kugaragara mu bigo bimwe na bimwe by’amashuri ukarandurwa burundu.

Abitabiriye amahugurwa biyemeje kunoza umuco w’isuku mu mashuri, mu bwiherero kwita ku cyumba cy’umukobwa, no gukuraho imirimo mibi bakoresha abana ituma batiga uko bikwiye.

Abayobozi b’ibigo by’amashuri biyemeje kubahiriza ambwiriza ya Minisiteri y’uburezi ashyiraho amafaranga atangwa mu mashuri kuri buri mwana, aho babonye ikibazo bakakigeza kuri Minisiteri y’uburezi kugira ngo hafatwe umwanzuro wumvikanyweho, aho kongera amafaranga mu buryo butemewe,

Abayobozi b’ibigo by’amashuri biyemeje gushyiraho uburyo bunoze bwo gukorera ku mihigo uhereye ku munyeshuri, ababyeyi, abarimu nabo ubwabo.

Abayobozi b’ibigo by’amashuri biyemeje gushyira amakuru yose y’uburezi muri system ya TMIS ndetse na SDMS kugira ngo ajye aherwaho mu gufata icyemezo.

Abayobozi b’ibigo by’amashuri kandi biyemeje gufata no gukoresha neza ibikoresho by’ishuri cyane cyane iby’ikornabuhanga kuko bikunze kugaragara ko mudasobwa zidakoreshwa icyo zagenewe;

Abayobozi b’ibigo by’amashuri biyemeje gushyira neza mu bikorwa  gahunda yo kugaburira abana ku ishuri, bafasha abana bose gufatira ifunguro ku ishuri.

Abayobozi b’ibigo by’amashuri biyemeje gutoza abana ikinyabupfura, no kwimakaza indangagaciro z’umuco nyarwanda mu barezi abarimu ndetse n’abanyeshuri, hamijwe kugira umunyarwanda muzima ubereye u Rwanda.

Abayobozi b’ibigo by’amashuri yose mu Ntara y’amajyepfo bitabiriye amahugurwa Ndetse n’abayobozi b’Uturere twose two mur’iyi Ntara.

Ubwitabire bwari hejuri cyane

Abayobozi b’ibigo by’amashuri yose mu Ntara y’amajyepfo bitabiriye amahugurwa.

Abayobozi b’ibigo by’amashuri yose mu Ntara y’amajyepfo bitabiriye amahugurwa.

Abayobozi b’uturere n’abayobozi b’uturere bungirije mu ntara y’amajyepfo bitabiriye aya mahugurwa.

Philomène Nyirahuku,Umuyobozi w'Ishuri rya Ecole Notre Dame de la Providence -Karubanda

Nyakubahwa Minisitiri wa MINUBUMWE, Dr.Jean Damascene Bizimana

Umuyobozi Mukuru wa REB, Dr. Mbarushimana Nelson

Nsanzimana Thacien, Umuyobozi w'ishuri ryo mu Karere ka Nyamagabe