Kuri uyu wa gatanu tariki ya 11 Ukwakira 2024 ku Isomero Rusange rya Kigali (Kigali Public Library), habereye igikorwa cyo kumurika kumugaragaro ibitabo bibiri byitwa “Indangagaciro mu bana bato” na “Uwera, urugero rwiza” byanditswe na Madamu Jeanne d’Arc Kanakuze.

Ni ibitabo byibanda ku burere bw’abana buhereye mu iterura ryabo.

Umuyobozi Mukuru w’Urwego rw’Igihugu Rushinzwe Uburezi bw’Ibanze (REB) Dr. Mbarushimana Nelson akaba n’Umushyitsi Mukuru muri iki gikorwa cy’imurika ry’ibi bitabo bibiri, yagaragaje uburyo ibi bitabo bifite akamaro kanini mu izamuka ry’urubyiruko n’abakiri bato muri rusange.

“Ibi bitabo ni intambwe ikomeye mu rugendo rwacu rwo kubaka umusingi n’imyitwarire myiza yo gutekereza ku iterambere ry’urubyiruko rwacu binyuze mu burezi bufite ireme bahabwa.” Nyakubahwa DG wa REB, Dr. Nelson abwira abari bateraniye muri iki gikorwa.

Umuyobozi Mukuru wa REB yakomeje agira ati: “Twizera ko ahazaza h’Igihugu cyacu hari mu biganza by’abana bacu.”

Dr. Nelson yongeye kwibutsa abari bateraniye muri uyu muhango ko ibitabo bifite uruhare rukomeye mu gufungura amarembo y’ibitekerezo bishya.

Tessy Rusera, Umuyobozi Mukuru wa Kigali Public Library, yashimangiye akamaro k’ibi bitabo: “Ibi bitabo ni inkunga ikomeye ku muryango nyarwanda kubera ko bije ari igisubizo ku bibazo tubona hanze aha muri sosiyete yacu.”

Madamu Rusera yakomeje agira ati: “Nk’Isomero Rusange rya Kigali twiyemeje kwimakaza umuco wo gusoma no kwandika. Kwakira imurika ry’ibitabo biri mu nshingano zacu.”

Umwanditsi w’ibitabo byashyizwe ku mugaragaro Madamu Jeanne d’Arc Kanakuze yagaragaje impamvu zatumye yandika ibi bitabo bibiri.

Kanakuze avuga ko igitabo “Indangagaciro mu bana bato” yacyanditse mu rwego rwo gutanga umusanzu ku burere bw’abana mu gihe ikitwa “Uwera, urugero rwiza” yacyanditse agamije kwerekana ko umwana w’umukobwa akwiriye kumenya uruhare rwe mu guharanira uburenganzira bwe.

“Ndashimira ababyeyi ku murava n’umwete mufite wo kubaka igihugu cyacu kizira abana badafite indangagaciro, bafite intubero yo kubaka igihugu.” Madamu Kanakuze ashimira ababyeyi n’abarezi muri rusange.

Madamu Kanakuze yashimangiye ku ngingo yo kuba yaranditse ibi bitabo ngo umwana abe yagira “inkomanga zo kugira indangagaciro zakagombye kuranga umunyeshuri w’iki gihe zirimo Gushimira.”

Indi ngingo Madamu Kanakuze yibanzeho mu kwandika ibi bitabo ni uruhare rw’umwana w’umukobwa ushobora gufata umwanzuro wo kuvuga ‘oya’ mu gihe bibaye ngombwa.

Abitabiriye uyu muhango wo kumurika ibi bitabo bibiri, bafashe umwanya wo kungurana ibitekerezo bigaruka ku kamaro ibi bitabo bibiri byagira mu izamuka ry’abana bityo bikabafasha mu kuzaba ababyeyi b’ejo hazaza

Imurikwa ry’ibi bitabo ryabayeho ku bufatanye bw’Urwego rw’Igihugu Rushinzwe Uburezi bw’Ibanze (REB) n’Isomero Rusange rya Kigali (Kigali Public Library).