Kuwa 30 Mutarama 2024, mu rwego rwo uteza imbere siporo mu mashuri kuwa 30 Mutarama 2024, Umuyobozi Mukuru w’ Urwego rw’Igihugu Rushinzwe Uburezi bw’Ibanze , Dr. Mbarushimana Nelson yahaye amashuri Nderabarezi uko ari cumi n’atandatu imipira yo gukina.

Umuyobozi Mukuru wa REB yaganiriye n’Abayobozi b’Amashuri Nderabarezi hamwe n’ abashinzwe amasomo muri ayo mashuri abakangurira kuba umusemburo w’ ibyiza aka ya mvugo igira iti: “nkore neza bandebereho”; abibutsa ko indangagaciro yo gukunda igihugu ikwiye kubaranga bityo bakayisakaza mubo barera kugirango nabo bazayisakaze ku bazabakomokaho.

“Nk’uko mubizi, amashuri nderabarezi ni umusingi w’uburezi ku gihugu cyacu kuko abanyeshuri twigisha nibo bazajya kwigisha barumuna babo mu mashuri y’inshuke n’abanza. Igihe tuzaba twabigishije amasomo asanzwe tukagerekaho n’indangagaciro nyarwanda ndetse na kirazira, tuzaba twizeye kuzagira abanyeshuri bafite imyumvire myiza batarangwa n’amacakubiri ahubwo barajwe ishinga no kwiteza imbere ndetse bagateza imbere n’igihugu cyababyaye.” Dr. Nelson abwira abayobozi

Umuyobozi mukuru wa REB yongeyeho ko kugirango amasomo agende neza bisaba kunyuzamo igihe cy’ ikiruhuko nk’uko biba byarateganyijwe ariko ko ibyo bitoroha na mba iyo nta bikoresho bya siporo biri mu mashuri.

“Hari ibikoresho dushobora kwishakira ariko hari n’ ibisaba ubushobozi. Ni muri urwo rwego Urwego rw’Igihugu Rushinzwe Uburezi bw’Ibanze ku ikubitiro rwageneye amashuri nderabarezi imipira yo gukina ya Vollebal, Football, Handball na Basketball ariko n’andi mashuri atari ayanyu akaba ari muri gahunda yo kubona ibikoresho. Turizera ko amashuri nderabarezi agiye gukomeza kuba inyenyeri imurikira andi mashuri ndetse nk’uko siporo ari ubuzima, abayeshuri bayigamo bakarushaho kugira ubuzima bwiza banitegura kuzajyana iyo mpamba y’ubumenyi kuri siporo mu mashuri bazajya kwigishamo ubwo bazaba barangije amasomo yabo.” Umuyobozi wa REB atanga ubutumwa

Abayobozi b’amashuri nderabarezi babyiniye ku rukoma bashimira Umuyobozi Mukuru wa REB ku mpano bakiriye. Nyuma yo guhabwa imipira biyemeje kuyifata neza kandi bakayibyaza umusaruro ari nako barushaho kuba urugero mu gukora siporo cyane cyane babera urugero abo bayobora aka ya mvugo ngo “nkore neza bandebereho.”

Umuyobozi wa TTC de la Salle nk’umuyobozi uhagarariye bagenzi be, yashimiye REB ku mpano nziza bakiriye y’imipira yo mu byiciro byose by’imikino uko ari bine (Football, Handball, Basketball na Volleyball) avuga ko abana b’abanyarwanda bazabyungukiramo bateza imbere banazamura impano bafite ndetse bikazafasha abarezi b’ejo hazaza kuzasohoka mu mashuri bafite ubumenyi bwisumbuye kuri siporo bakazabufashisha n’abo bazigisha bagiye mu kazi nyirizina.

“Iyi mpano si nto, iraduhagije kandi twishimiye ko REB ihora itekereza ku mwana w’umunyarwanda n’ejo heza he. Amashuri nderabarezi ni ikubitiro akaba n’umusingi w’uburezi bufite ireme muri iki gihugu kuko ariyo ategura abarezi b’ejo hazaza.” Furere (Frère) Paul ashima

Uyu muyobozi wa TTC de la Salle yagize ati: ”kugirango twitegure kuba umusemburo w’abo tuzigisha, ni iby’agaciro ko tuba umusemburo wa siporo aho hateguwe amarushanwa ahuza abanyeshuri bo mu mashuri nderabarezi azatangira ku italiki 17 Gashyantare uyu mwaka igikorwa cyo gufungura ayo marushanwa kikazabera kuri TTC de la Salle aho ikipe ya REB Volleyball izakina n’ikipe y’abayobozi ba za TTC n’abungiriza babo ndetse n’abanyeshuri bakazakina imikino itandukanye nk’uko bazaba bavuye mu bigo bitandukanye tukazagaragaza ko ibikoresho bya siporo twahawe dushoboye kubikoresha”. 

Furere (Frère) Jean Paul yongeyeho ko usibye abanyeshuri biga mu mashuri nderabarezi; abanyeshuri, abayobozi b’ibigo, abayobozi mu nzego zitandukanye ndetse n’ababyeyi babararikira kuzaza kwifatanya nabo kuri iriya taliki kuko siporo ari ubuzima.

Mu minsi ishize Minisiteri y’ uburezi hamwe, FERWAFA hamwe n’abandi bafatanyabikorwa ba Leta batangije siporo n’umuco mu mashuri aho icyo gikorwa cyabereye kuri sitade ya Nyagatare mu rwego rwo guha imbaraga siporo n’umuco mu mashuri hakaba hitezwe ko impano ziri mu bana b’abanyarwanda zizakomeza kugaragara ariko cyane cyane izifite aho zihurira n’mupira w’amaguru.

Umuyobozi w’ Urwego rw’ Igihugu Rushinzwe Uburezi bw’Ibanze (REB), Dr. Mbarushimana Nelson akaba yari n’ intumwa ya Minisitiri w’ Uburezi mu muhango wo gutangiza umwaka wa siporo n’umuco mu mashuri ku nsanganyamatsiko igira iti: “IMIYOBORERE MYIZA INKINGI Y’ ITERAMBERE.”

Yagize ati:  “Dushinzwe gutegura integanyanyigisho harimo na siporo ndetse no gutanga abarimu bashoboye bigisha siporo, kubahugura ndetse no gukora uko dushoboye ikoranabuhanga rigatera imbere mu mashuri yose.”

Yongeyeho ko siporo ari ingenzi kandi bikaryoha cyane kubona ibendera ry’Igihugu rizamurwa n’ amakipe atandukanye ahagararira Igihugu. Turifuza ko amakipe azatsinda akazajya muri FEASSA akarere ka Nyagatare kazagira amakipe atandukanye muri siporo zose. Minisiteri y’ Uburezi irifuza ko amakipe azajya atsindira ibikombe mu mikino itandukanye yashakirwa ingengo y’imari akajya abanza kwitegura, agakina n’ andi makipe yo mu karere hanze y’Iguhugu mbere y’uko FEASSA itangira.

“Minisiteri ifite Uburezi mu nshingano binyuze mu Rwego rw’ Igihugu Rushinzwe Uburezi bw’Ibanze (REB) turifuza ko buri shuri ryagira umwarimu wize ibya siporo warangije icyiciro cya kabiri cya kaminuza mu rwego rwo gutanga uburezi bufite ireme muri siporo. Ubundi buri mwaka ku bufatanye n’uturere duhitamo abarimu icumi (10) bakajya kwiga muri kaminuza y’ u Rwanda biga uburezi; ariko muri abo icumi hagomba kuzajya habamo n’ abazajya biga siporo muri kaminuza kugirango dukomeze tugire abarimu bashoboye ndetse muri abo icumi bashobora kwiyongera.” Umuyobozi Mukuru wa REB, Dr. Nelson niko yavuze.

Umuyobozi wa REB yibukije abayobozi b’ ibigo by’ amashuri ko aribo pfundo rya byose, ibyo bivuze ko abayobozi b’ ibigo bakwiye gukunda siporo bityo abanyeshuri bakabigiraho bityo intego ya siporo n’ umuco mu mashuri ikagerwaho.